![Oyo: Tricyclists Protest over Hike in Licence Fees [PHOTOS]](https://eaglessightnews.com/wp-content/uploads/2024/11/IMG-20231213-WA0014.jpg "Tricyclists Protest in Oyo EaglesSightNews")
ONDO KINGDOM:ṢÈYÍ TI JAGUNMÓLÚ
ṢÈYÍ TI JAGUNMÓLÚ!
By Ayélabégàn Akínkúnmi Baba Awo.
Ọ̀kan gbóògì nínú ọmọ ẹgbẹ́ GSM ADVOCATES
Ìwọ̀ -oòrùn Ọ̀yọ́
B’éwúrẹ́ bá kangídì a dòbúkọ,
Àgùtàn kangídì a dàgbò,
B’Óbìnrin kangídì a dìyálé,
Ìyálé tó bá kangídì ní í m’ètò àsè..!
Koríko wẹ́rẹ́wẹ́rẹ́ digbó,
Ìrì wẹ́rẹ́wẹ́rẹ́ d’òjò,
Ahéré di abà,
Abà dìlú ńlá
Omi sẹ́lẹ̀rú ṣe bẹ́ẹ̀ ó d’odò tí ń sàn tó ń s’aráyé láńfààní,
Ọmọ ìkókó ló pàpà di baba,
Aròbó àná ló dìyálé sọ́ọ̀dẹ̀!
Iṣẹ́ Akin ló sọ ọmọ Mákindé di àpèwááwò káàkiri ilẹ̀ yìí,
Gbogbo ìpínlè ló ń w’ọkọ Olúfúnkẹ́ bí i kó jẹ́ tiwọn,
Jákèjádò ilẹ̀ Yorùbá ni wón ń fẹ Ọmọ Ọlátúbọ̀sún dọ́kàn!
Sèyí Mákindé, Ìnáròbó lẹ́nu alátakò àná ti ṣe bẹ́ẹ̀ ó dọ̀gá ńlá!
Isẹ́ ribiribi tó f’Akin ṣe ló wú Òṣémàwé lórí,
Ó ṣe bẹ́ẹ̀ ó di JAGUNMÓLÚ l’Óǹdó ẹ̀gin,
Ọkọ Olúfúnnkẹ́ ti dolórí oko fún gbogbo wọn,
Ọmọ ‘Látúbọ̀sún ti sọ àwọn òpè dakúrẹtẹ̀ kalẹ̀.
Ẹ wọ̀tún, ẹ tún wòsì wò ná,
Ẹ wo ‘wájú kí ẹ tún wẹ̀yìn kún,
Ẹ wò ‘là kẹ́ ẹ tún wò ‘wọ̀ oòrùn,
Ẹ ṣíjú wo Gúúsù kí ẹ w’àríwá ìpínlẹ̀ ọ̀yọ́,
Ẹ wo bó ṣe sọgbó dilé,
Ẹ wo bó ṣe sọ̀ ‘gbẹ́ dìgboro,
Ẹ rí i bó ṣe sọ gbogbo àkìtàn ilẹ̀ yìí dọjà tó ń tà wàràwàrà!
Ṣèyí kúrò láròbó,
Ọpọlọ pípé lọmọ Májọlágbé fi ń ṣiṣẹ́ ọba,
Ìbẹ̀rù Ọlọ́hun tó fi ń sìnlú ti pọ̀tá lẹ́numọ́,
Wọ́n ò sọ̀tẹ̀ mọ́,
Àní wọ́n ti gbáròyé tì!
A dúpẹ́ nípìnlẹ̀ Ọ̀yọ́,
A ò gbé aṣọ wa rán fónígbàjámọ̀,
A ò gbé irun orí fún kanlékanlé,
A ò bẹ fọganáísà pé kó báwa tún ìlẹ̀kùn wa ṣe!
Ọ̀bẹ kò ṣe é gé ‘gi
Àáké kò ṣe é hó’sàn
Àdá kò dùn ún fárí rárá
Olórí pípé la gbéṣẹ́ fún nìpínlẹ̀ Ọ̀yọ́,
Abìwà pẹ̀lẹ́ bí orí adẹ́tù
Olúṣèyí Abíọ́dún ọmọ Mákindé
Wẹ́rẹ́wẹ́rẹ́ nikán ń mọlé,
Pẹ̀lẹ́pùtù là á yọ’ṣẹ̀ lẹ́kù,
Máa ṣe wẹ́rẹ́ forí pípé tukọ̀ ìjọba ìpínlẹ̀ yìí nìsó,
Igbá oyin lo gbé, o ò gbé ‘gbá ata!
Mùmùràrà layé ń dẹ̀wá lọ́rùn.
Ṣèyí Mákindé JAGUNMÓLÚ,
Oyè á mọ́rí ooooo!
